港式台灣麻雀（港式台牌）· Heion Technologies · 最後更新 2026-09-19
呢個 app 冇帳戶、冇登入、冇廣告、冇第三方分析工具,亦唔會賣任何資料。 單人打牌唔需要上網。有網絡嘅時候,app 會將匿名嘅使用統計送去我哋自己嘅伺服器(見下面「使用統計」),但唔會送出你嘅牌、名或者任何你打落去嘅嘢。
以下全部存喺你部機嘅本機儲存空間（localStorage）,唔會自動上傳:
| 乜嘢 | 點解要 |
|---|---|
| 你嘅設定（名、音效、番數表、枱規等） | 下次開返一樣 |
| 未打完嘅牌局 | 俾你繼續 |
| 玩牌記錄（分數、流水） | 事後對數 |
| 房號同座位憑證 | 斷線之後返得返個房 |
| 喺呢部機最早用呢個 app 嘅日期 | 將來俾早期玩家優惠時認得你;而家唔會用,亦唔會上傳 |
刪除 app 就會一併刪走。
為咗知道有幾多人用、幾時最多人玩、每次玩幾耐、邊啲功能有人用,app 會將以下嘢送去我哋自己喺 Cloudflare 嘅伺服器。唔經任何第三方,冇用 Google Analytics 或者 Firebase,亦唔會攞廣告識別碼。
| 乜嘢 | 點解要 |
|---|---|
| 一個隨機裝置編號(同寄意見用嗰個係同一個) | 數有幾多部機用緊、有冇返嚟再玩 |
| 開 app、每分鐘仲開緊、打開咗邊個畫面 | 知道幾時最多人玩、每次玩幾耐 |
| app 版本同平台(網頁 / iPhone / Android) | 知道要支援邊啲版本 |
| 字體大小、主題、出牌提示、音效、報牌嘅設定 | 決定預設應該點揀 |
| 開枱嘅玩法(有冇百搭、越搭、換牌、打幾圈、難度、用邊個內置番表)同有冇打完 | 知道邊啲玩法多人玩 |
| 開房定入房 | 知道網上玩得幾多 |
| 有冇撳公告嘅連結 | 知道公告有冇人睇 |
| app 出錯時嘅錯誤訊息 | 修正問題 |
| 用網頁版時由邊個網站連過嚟(淨係網站名) | 知道人喺邊度搵到我哋 |
唔會送出:你嘅牌、出牌、房號、你或者電腦玩家嘅名、你自己存嘅番表名、任何你打落去嘅文字、位置、廣告識別碼。伺服器見到你嘅 IP 位址,但唔會記錄。
個裝置編號係隨機產生,入面冇你嘅名或者任何身份資料;刪除 app 或者清除網站資料之後就會換過一個新嘅,之前嘅統計亦連唔返去你。喺開發機上面運行、未提交嘅版本唔會送出統計。
只有你主動㩒寄出,先會有資料離開你部機。嗰陣會送出:
| 乜嘢 | 點解要 |
|---|---|
| 你打嘅文字同評分 | 就係你想講嘅嘢 |
| 你填嘅名（可以唔填） | 回覆同分辨 |
| 當時嘅畫面名、app 版本、螢幕尺寸、瀏覽器字串、音效狀態 | 重現你遇到嘅問題 |
| 如果係牌局意見:嗰一鋪牌嘅內容（牌、出牌次序、結算） | 喺開發機重播同一鋪牌 |
| 一個隨機裝置編號 | 防止洗版 |
| 你嘅 IP 位址 | 防止洗版 |
唔會送出:通訊錄、位置、相片、麥克風、廣告識別碼,或者任何同你身份有關而你冇自己打落去嘅嘢。
開房或者入房嗰陣,你嘅玩家名、房號同牌局狀態會經 Cloudflare 嘅伺服器傳俾同房嘅人。 房入面冇人之後保留 5 個鐘,然後刪除。⚠️ 你打嘅玩家名同房嘅人見到,所以唔好用真名或者敏感字眼。
匿名用枱統計:開咗網上枱之後,伺服器會記低一行統計 —— 幾時開枱、打咗幾多鋪、最後一鋪幾時完、有冇打完、枱上有幾多個真人、打幾圈,同埋有冇玩百搭(幾多隻)、越搭或者換牌。 唔記玩家名、房號、座位憑證、IP 或者任何裝置編號。每行得一個伺服器自己隨機產生、從來唔會傳俾任何人嘅編號,所以連唔返去任何人。用嚟知道網上枱實際用得幾多、開幾耐,安排伺服器同將來嘅會員。單人打牌唔會有呢樣。
意見存喺 Cloudflare D1(美國/全球邊緣網絡),由 Heion Technologies 保管,只用嚟改善呢個 app。 牌局資料保留到問題解決為止;你想刪走自己寄過嘅意見,電郵嚟講聲就得。 匿名用枱統計都係存喺 Cloudflare D1;因為連唔返去任何人,冇辦法、亦唔需要按人刪除。 使用統計存喺另一個 Cloudflare D1 資料庫,只用嚟改善呢個 app。佢連住嘅係一個隨機編號而唔係你,所以我哋冇辦法由你嘅身份搵返你嘅紀錄;想重新開始,刪除 app 或者清除網站資料就得。
呢個 app 唔係專為 13 歲以下人士而設,亦唔會刻意收集佢哋嘅資料。
呢個 app 係計番遊戲。冇真錢、冇 App 內購買、冇任何形式嘅投注或者兌換。 「番」同「番錢」淨係遊戲入面嘅分數。
Heion Technologies —— [email protected]